Nimin khan Lawngtlai District Development Co-ordination and Monitoring Committee (DISHA) chu an Chairman, Member of Parliament (Lok Sabha) Pu C. Lalrosanga hovin Lawngtlai DC Conference Hall-ah an thu khawm.
Sorkar thuchhuahin a tarlandanin, Pu C. Lalrosanga chuan COVID-19 hri leng avang leh harsatna hrang hrang avanga hun eng emaw chen hmaichhana inhmuh khawmna buatsaih a theih loh avangin video conferencing hmangin duhthusam lo takin DISHA meeting buatsaih a tul thin tiin, tun tumah hmaichhan ngeia ram hmasawnna hna thawh thlir ho a ni leh thei ta chu lawmawm a tih thu a sawi a. DISHA chu ram hmasawnna tura sawrkar scheme te tihhlawhtlinna kawnga tha zawka hna thawh a nih theih nana mipui aiawha thlan chhuah te, a hna kalpuitu sawrkar hna thawk leh tlawmngai pawlte nena inrawn khawmna leh sawi hona hmun pawimawh tak a ni, a ti. Hmasawnna hna hrang hrang enkawltu leh viltute chu tan lak ngaihna lai leh ngaih pawimawh lai turte zir thar nan hman thiam tum turin a chah.
DISHA thut khawmah hian LADC a CEM Pu V. Zirsanga, Member Secretary & Lawngtlai DC, Pu Amol Srivastava leh DRDA Project Director Pi Marilyn Rualzakhumthangi bakah, sawrkar official-te, bank leh tlawmngai pawl ai awhte an tel a. Sawrkar kum kal mek 2022-23 chhunga Lawngtlai District-a sawrkai laipui ruahmanna hnuaia hmasawnna hna hrang hrang kalpui tawh chin thlir ho niin, harsatna awmte leh a chin fel dan tur leh hma lak zui zel dan tur te sawi ho a ni.
DISHA thut khawma sawrkar laipui scheme hrang hrang sawi hote chu - PMGSY; IBBFL Scheme & utility shifting due to widening of National Highway; Jal Jeevan Mission & Swachh Bharat Mission-Grameen (SBM-G); PMAY-U & Swachh Bharat Mission-Urban (SBM-U); NHM; NSAP & ICDS; NFSA; PMEGP; MGNREGA, PMAY-G & PMKSY 2.0; BADP, MzSRLM & DDU-GKY; Samagra Shiksha leh BSNL hma lakna te a ni.
DISHA thut khawma tar lan dan chuan, MGNREGA hnuaiah Lawngtlai District-ah job card 35,932 awm mekin, kum 2022 April - June thla chhungin chawh rualin ni 28 inhlawhna siam tawh a ni a. Job card Aadhaar seeding tih tawh zat hi 98.08% a ni. April - June, 2022 inkarah material component atanga hna thawh 1,146 awmin, hna 335 thawh zawh tawh a ni a, thawh lai mek 811 a awm.