Nimin atang khan Lawngtlai leh Bungtlang South ah Sorkar office, Bank leh Zirna In te khar niin, vawiin hian chhunzawm a ni a, vawiin khan MNF General Hqrs Aizawl a Adviser Prof. LH Chhuanawma chuan Central YLA hruaitute hmuin, Health Minister in Picketing tihtawp tur a ngen thute, Lawngtlai District in a mamawh anga Doctor dah chu tun maiah tihhlawhtlin harsa a nih vangin, ngaihpawimawh hmasak ah Sorkar in a neihtur thu Health Minister in a sawi thute Central YLA hruaitute hi a hrilh a, Health Minister atanga ngenna an dawng chu lawmawm an tih thu Central YLA hruaitute chuan sawiin, tun dinhmun ah mipui tan lungawina leh thlamuanna tur an hmulo tih sawiin, an thilphutte tihhlawhtlin a nih hma chuan Sorkar an nawrna chu tawpsan an tumloh thu Prof LH Chhuanawma hi an hrilh.
Central YLA hian District Hospital, Lawngtlai ah Specialist Doctor dahbelh tur leh Bungtlang South ah Doctor dah turin Sorkar an lo ngen tawh thin a, May 20 khan District Hospital Lawngtlai a Doctor pahnih chu sawn an ni a, a hnu May 23 ah Doctor dang pahnih sawnchhuah leh niin, Doctor dang pathum District Hospital ah hian sawnluh an ni a, nimin May 25 khan May 20 a Doctor pahnih sawnchhuahna Order chu sut niin, Doctor pakhat sawnluhna Order suttel a ni bawk.
Central YLA hruaitute chuan Sorkar thiltihdan ah lungawina tur an hmulo tih sawiin, a tul anga nawr chhunzawmzel an tum thu an sawi.