Special Summary Revision, 2022 neih zawh taka Lawngtlai District-a assembly bial pathuma final electoral roll chu Inrinni khan Lawngtlai District Election Officer, Dr Andrew H. Vanlaldika chuan DC Conference Hall-ah a tlangzarh a. Final electoral roll, 2022 hi political party ai awhte hnenah a hlan nghal.
Lawngtlai DEO chuan a hun taka final electoral roll, 2022 tlangzarh theih a ni chu thawktute inpekna vang a nih thu sawiin, Political party ai awhte chu uluk taka electoral roll chu zir chiang a, dik lo leh felhlel a awm palh pawha siam that dan turah finchhuah turin a chah a. Inthlan dawn hnaihah leh mamawh hunah chawpchilh taka buai chuk chuk ngai lo turin, voter-te paw'n electoral roll-a an chuan leh chuan loh emaw, an chanchin kimchang tar lan a dik leh dik loh emaw te enfiah nachang hre turin leh siam that ngaite a hun laia siam thattir nachang hre turin a chah bawk.
Inrinni a tlangzarh tak Lawngtlai District final electoral roll, 2022-ah hian Tuichawng Assembly Constituency -ah vote nei mipa 17,330 leh hmeichhia 16,870, an vaiin mi 34,200 an awm a; draft roll aia a punna hi 1,178 a ni. 37-Lawngtlai West bialah vote nei mipa 14,216 leh hmeichhia 14,058, an vaiin mi 28,274 an awm a; draft roll aia a punna hi 806 a ni. Lawngtlai East bialah voter mipa 12,140 leh hmeichhia 12,994, an vaiin mi 25,134 an awm a; draft roll aia a punna hi 537 a ni. Lawngtlai District-ah hian a pumpuiah vote nei mipa 43,686 leh hmeichhia 43,922, an vaiin mi 87,608 an awm a; draft roll atangin voter 2,521-in an pung a ni.
Tuichawng biala polling station 70 awmah, voter 1,019 awmna Ugudasury South chu voter tamna ber niin, voter 128 awmna Charluitlang chu voter tlemna ber a ni a. Lawngtlai West biala polling station 69 awmah, voter 989 awmna Chawngte 'P' chu voter tamna ber niin, voter 71 awmna 37/34-Hlimzawl chu voter tlemna ber a ni a. 38-Lawngtlai East biala polling station 42 awmah, voter 1,051 awmna Sangau Vengthar chu voter tamna ber niin, voter 110 awmna Council Veng East-II chu voter tlemna ber a ni thung.
Fnal Electoral Roll, 2022 hi mahni bialtu Booth Level Officer te hnenah emaw, Electoral Registration Officer te hnenah emaw, DC office Election Branch-ah emaw, online-in NVSP Portal, nvsp.in emaw, electoralsearch.in emaw-ah te a duh tan en theih a ni.