Tuidangtlang a Vawk damlo te chu endik chinah ASF hmuhchhuah a nilo.

        Lawngtlai District chhimlam, Tuithumhnar MDC bialchhung, Tuidangtlang ah tunlai hian Vawk hri a leng mek a, Vawk hi hri vanga an thih mai hlauhna vangin,  Zirtawpni pawh khan vawk panga talh a ni.

        Tuidangtlang hi Bru khua niin In 92 a awm a,  Vawk hri a len thu hi Lawngtlai DC pawh hrilhhriat ni tawhin,....DC, Dr Andrew H.Vanlaldika chuan, AH&Vety Department te chu hmala nghal tura hrilhin, Inrinni khan  Bungtlang South atangin, AH&Vety mithiam ten Tuidangtlang hi panin,  Vawk damlo te thisen  laksakin an endik, an endik chin ah chuan ASF hmuhchhuah a nilo.

        ASF hi hmuhchhuah nilo mahse, AH&Vety hotute chuan, Sample an endik chu Vawk damlai te a nih hlawm vangin, Vawk thite chu ASF vanga thi an nih leh nihloh finfiah theih a nilo tih an sawi a, heivang hian theihtawp a fimkhur turin mipuite an chah.

 

        Tuithumhnar bialtu MDC, Pu H.Lalmuansanga,  pawhin a bialchhung, Tuidangtlanga Vawk hrileng chu Council Sorkar atanga a theih ang anga buaipui a nihtheih nan hma a la nghal bawk. 

 

        
Hetianga, a chhan hriat lova, Vawk damlo an awm nual vang hian Lawngtlai District Magistrate, Dr.Andrew H.Vanlaldika chuan Inrinni khan thupek chhuahin, Tuidangtlang ah Vawk lakluh leh lakchhuah a khap a, Vawk talh pawh khap niin, a sa zawrh chhuah pawh District Magistrate chuan a khap bawk.