Tunhnai mai khan Mizo Youtuber pakhat chuan, Lawngtlai District a mithenkhatten Myanmar Sipai te hnen ah pawisa pein, Myanmar ram chhungah thing an zai thin thu leh, Democracy duhlotute lo tanpui leh Raltlante theihtawpa chhawmdawl an nihlai a, Sipai kuta pawisa lo pek chu thil tihawm a nihloh thu a rawn tarlang a nih kha.
An sawi anga ramri kana thingzai a, Myanmar Sipai te nen inremsiamna nei an lo awm a nih pawhin, Raltlan te nen sawizawm a, mipui ngaihtuahna tihnual thei zawnga hruaikawi tum na awmthei hi a fuhberlo maithei a, Myanmar ram luttur chuan India Sipai Duty post pawh paltlang hmasak ngai a ni a, a ruka thingzaite humtumna lam nilovin, Myanmar tualchhung buaina nen sawizawm a, Lawngtlai District hming tichhe zawng lek lek a ngaihdan zam kual hi a fuhchhiahlo maithei.
Khulai ramri dinhmun khu sawitam ngailovin mitamtakin an hriatsa a ni a, tunhma atang tawhin, nupui pasal inneih pawlh, chikhat, hnamkhat, chhiatni thatni a inpuibawmtawn reng an ni a, tuna kawngpui a chhuahhma daih atang tawhin Thingzai mai nilo, ei leh bar thlengin a remchandan angin chawkluh a ni fo thin a, a michengten an zir miau vangin, ramin ri a nei a, hnamin ri a nei velo tih hi khulai bawr ah khuan a lang chiang thin awm e.
Hetiang a nih vang hian kawngpui a tlang hnuah pawh, thingzai a sumdawngte hian kua hreuhin tan an la nitur ah ngai ila, Myanmar Sipai te tanpui duhna lam aiin, an mimal sumdawnna ah an insawrbing deuh te pawh a ni mahna, hetiang thil hi dan kalh a nih miau vangin Sorkar chuan hma a lak thuai a tul a, raltlante lo dawnsawn leh enkawlna ah erawh kan tha tithumtu atan hman chi a nih a rinawmloh.