Tuidangtlang ah Vawk damlo a awm nual

        

          The Lawngtlai Post in thu a dawndanin, Lawngtlai District chhimlam, Tuithumhnar MDC bialchhung, Tuidangtlang ah tunlai hian Vawk hri a leng mek a, Vawk hi hri vanga an thih mai hlauhna vangin, nimin Zirtawpni pawh khan vawk panga talh a ni.

              Tuidangtlang hi Bru khua niin In 92 a awm a, he khuaa Vawk hri a len thu hi Lawngtlai DC pawh hrilhhriat ni tawhin, DC, Dr Andrew H.Vanlaldika chuan, AH&Vety Department te chu hmala nghal tura hrilhin, vawiin hian Bungtlang South atangin, AH&Vety mithiam ten Tuidangtlang hi panin, an dinhmun an enfiah.

            Tuithumhnar bialtu MDC, Pu H.Lalmuansanga, LADC a Deputy Chief Whip pawhin a bialchhung, Tuidangtlanga Vawk hrileng chu Council Sorkar atanga a theih ang anga buaipui a nihtheih nan hma a la nghal bawk. Myanmar atanga Vawk lakluh atanga hri hi darhta ni a sawi a ni.

                    Hetianga a chhan hriat lova, Vawk damlo an awm nual vang hian Lawngtlai District Magistrate, Dr.Andrew H.Vanlaldika chuan vawiin khan thupek chhuahin, Tuidangtlang ah Vawk lakluh leh lakchhuah a khap a, Vawk talh pawh khap niin, a sa zawrh chhuah pawh District Magistrate chuan a khap bawk.