Governor in Chawngte a tlawh

     Mizoram Governor,  Dr Hari Babu Kambhampati chuan vawiin khan Chakma Autonomous District Council   hmunpui, Chawngte   a tlawh.

    Governor hian zing dar 10:30-ah helicopter-in Chawngte a thleng a. Tuichawng bialtu MLA Dr BD Chakma, Lawngtlai Bawrhsap Dr Andrew H. Vanlaldika, CADC a Chief Executive Member   Pu Rasik Mohan Chakma,   leh official dangte'n an lo dawngsawng  

    CADC Rest House tuala amah lawmna inkhawm,  Lawngtlai DC, Dr Andrew H. Vanlaldika chuan a kaihruai  ah, Governor Dr Hari Babu Kambhampati chuan Lawngtlai District chhunga Sub-Division pakhat leh CADC hmunpui, Chawngte tlawh theia a awm chu lawmawm a tih thu a sawi a. Hma sawnna kawngah ram chhung hmun dang nen khaikhina Autonomous District Council huam chhunga mite an hnufual bik thin chu pawi a tih thu sawiin, State sawrkar leh District Council hnuaia thawktu zawng zawng chu ram bial leh a mi chengte hmasawn nana theih tawp chhuah chu an mawhphurhna a ni tih hre thar  turin a chah.

    Governor chuan sawrkar laipuiin mipui hamthat nana scheme a duan - Pradhan Mantri Jan Dhan Yojana (PMJDY), Pradhan Mantri Jeevan Jyoti Bima Yojana (PMJJBY), Pradhan Mantri Surakhsa Bima Yojana (PMSBY), Atal Pension Yojana (APY), Pradhan Mantri Ujjwala Yojana (PMUY) leh scheme hrang hrangte chu mipui vantlangin an hriat a, an chhawr tangkai theih nan mipuite hnena awareness pek bakah, a hlawhtlin nana theih tawp chhuah chu sawrkar hna thawkte mawh a nih thu a sawi a. Prime Minister-in India ram mipuite mahni kut kea ding a, intodelhna kawng zawh tura "Atmanirbhar Bharat" (Self Reliant India - Mahni Intodelh) auhla nena a sawmna tihlawhtling tura theih tawp chhuah turin official kal khawmte leh mipuite chu a chah a.

     Autonomous District Council chungchanga India Danpuiin Governor kova mawhphurhna a nghahte chu tha taka hlen chhuah a tum thu sawiin, mipuite hamthat nan District Administration leh District Council te chu inlungrual taka thawk ho tura a duh thu a sawi bawk.

    Governor lawmna inkhawm hman zawh hian CADC Rest House Conference Hall-ah state sawrkar leh CADC hnuaia department hotute, Larsap hian a kawm a,  Lawngtlai


    DC, Dr Andrew H. Vanlaldika'n Chawngte Sub-Division dinhmun tlangpui leh SP Pu DKS Singh-in Chawngte Sub-Division chhunga venhimna lam dinhmun powerpoint presentation an pe a. Tlawmngai pawl hruaitute, kohhran hruaitute, political party hrang hrang hruaitute leh CADC-a member-te nen inkawm hona hun buatsaih chhunzawm a ni a. Hemi hnu hian Larsap chuan Chawngte Community Health Centre tlawhin, an dinhmun a en a, hemi hnu hian helicopter-in Aizawl lam pan.