Vawiin khan New Vengpui, Lawngtlai chuan an Veng chu Dry Area ah an puang.. Dry Area puanna Inkhawm hi New Vengpui, Tawklinga Traffic Point ah neih niin, New Vengpui Branch YLA, Secretary Pu C.Lalhmachhuana’n a kaihruai a, New Vengpui a tlawmngaipawl pahnih Lai Women Association leh MHIP bakah, Addl SP Pu C.Lalruatkima leh Central YLA General Secretary Pu JH.Lalrindika ten thu an sawi a, thusawitute chuan Lawngtlai khawpui chhunga Zu zuar tamna Veng leh ruitheihthil ti ten an pan khawm thin Veng ni thin in Dry Area a an Veng an puang chu lawmawm an tih thu an sawi a, Lawngtlai khawpui chhungah Model Village an nih theih ngeina tura Pawl hrang hrang leh Kohhran te an tanrual zel a pawimawh thu an sawi bawk.
Pu A. Lalthankima, Adviser, YLA New Vengpui Branch chuan New Vengpui Dry Area ah a puanga, Ruihhlo tih bo an tumna kawngah Vengchhung mipui ten YLA leh VC te tha taka an tawiawm zel a pawimawh thu a sawi a. New Vengpui chu Ruihtheihthil zuar awm lohna veng anih theihna tur atan Dry Area ah a puang.
New Vengpui huamchhungah ah hian tun dinhmunah In 421 awmin, mihring 1600 vel an cheng meka, Zu zuar chhungkua 26 awmin, Dry Area a an puan dawn avang hian Pathianni khan an Veng chhunga Ruihtheihthil zuarte kokhawm in, heng an thil zawrhte hi an sim ngei dawn tih intiamkamna Legal Paper ah hming an ziakhnan vek ani.
New Vengpui Branch YLA President, Pu K.Zosangzuala chuan Ruihtheihthil zuarten an zawrh loh vanga nitin khawsakna lamah harsatna an tawk anih chuan YLA chuan hma ala zel dawn a, Vengchhung mi tumah chhuanchhama an awm an phal loh thu a sawi.