Khawpui fai endiktuten Lawngtlai an endik

     Mizorama khawpui endiktu, Member pathum awmna Pannel of Judges te chuan vawiin khan Faina lama Lawngtlai khawpui  dinhmun enfiahin, Sorkar hotute an kawm bakah, khawpui chhung an fangkual

    Pannel of Judges te hian nimin tlai khan Lawngtlai lutin, DC Conference Hall ah, State leh Lai Autonomous District Council a Sanitation Department hotuten, Lawngtlai khawpuia Faina lama hmalakna hrang hrangte an hrilh a, tukin zing khan Lawngtlai khawpui chhunga veng hrang hrang fangin, khawpuilunlai, National Highway in a paltlang lai aiin, veng penhleh leh kilkhawr deuh ah pawh Lawngtlai khawpui chuan faina lama tan a laknasat zia hriat a nih theih nan heng hmunte hi fan pui an ni a, an kalna apiangah Village Council ten lo dawngsawngin, an huamchhunga hma an lakdante an lo hrilh fiah.

    Anmahni lo dawngsawngtu VC te chuan, Lawngtlai khawpui chuan faina kumhlun neitura tan an laknasat thute, khawtlang huap piahlam ah, naupangte pawh faina an thanlenpui theih nan a takin zirtir an nih thute, Kohhran thlengin a theih dan ang angin Faina lam ah tan an laknasat thu te Pannel of Judges te an lo hrilh.

    Khawpuifai endiktu Pannel of Judges te hi UD&PA Department a Deputy Director Pu Ralthuama Ralte in a hova, Member pahnih Pi Casy Lalnunsangi, Scientific Assistant, Mizoram Pollution Control Board leh Pu Lalrinmawia Secretary  MJA Gen Hqrs Aizawl ten tawiawmin, khawpuifai result hi nakuma Republic Day hman hun ah puan a ni ang, Khawpui fai endiktute hian  vawiin vek khan   Siaha khawpui dinhmun enfiah turin Lawngtlai an chhuahsan.