Lawng inhlanna hun hi Liapha chhuahah neih a ni a, Pu JH. Lalrindika, General Secretary, Central YLA chuan, Vaurawng Group USA leh MZP te chungah lawmthu a sawi a, tuipui ral atanga raltlante ngaihventu an nei leh Mizorama zirlai pawl lian berin tha an thawh chu lawmawm a tih thu a sawi.
Lawng an dawn hi Saisihchhuahah an dah tur thu, Central YLA General Secretary chuan a sawi a. Lawngtlai District a Myanmar raltlante rawn kaina ber chu Saisihchhuah a ni a ti a, raltlante thiarkai nan hian mimal lawng hman niin, a thiarkai man chungchangah raltlante hian harsatna an tawk thin tih sawiin, hetiang hun an tawh laia Vaurawng Group USA in MZP kaltlanga raltlan thiarkaina tur lawng an pe chu lawmawm a tih thu a sawi.
Central YLA leh MTP te hnena Vaurawng Group USA kaltlanga lawng hlantu Pu B. Vanlaltana, President MZP chuan, Central YLA leh MTP chu a tak taka raltlante buaipuitu an ni a, raltlante pawhin an thlamuanpui hle a ni a ti a. Raltlante tana an insensonaah Vaurawng Group USA chungah lawmthu a sawi bawk.
Vaurawng Group USA kaltlanga MZP ten lawng an hlan hi pathum a ni a, Central YLA kutah pakhat an hlan a, a dang pahnih chu MTP kutah an hlan.