Dr Andrew H. Vanlaldika chuan Police leh Excise te'n District chhung ralmuan nan leh thianghlim nana an hna thawh chu lawmawm a tih thu sawiin, thawktu indaih lo chung pawha tha taka hna an thawk thei chu a fak a. Lawngtlaia ruihtheihthil hluar thar nia lang chungchanga an hma laknaah theih tawp chhuah zel tura fuih tharin, ruihtheihthil - damdawi leh zu tirem tura hma lak dan tura a duh dante a sawipui a ni.
He hunah hian Lawngtlai Police leh Excise hotute chuan an hma lak dan report an pe a. Theih tawp chhuaha hma an lak chhunzawm zel tur thu an sawi a ni.
Lawngtlai Police chuan October ni 5, 2021 khan an thu dawn bawhzuiin, Pu K. Lallungkhama (59) s/o Thawngvung (L), Lawngtlai Chandmary leh Pu Lalthakima (27) s/o Biaksiama, Lawngtlai Chandmary te hnen atangin heroin no. 4 hawng 8 an man a. Lawngtlai Police Station-ah ND&PS case register nghal a ni. An damdawi man hi a market value Rs nuai 4 vel nia rin a ni a. A neitute hi Champhai lam mi leh Pangkhua mite niin, Lawngtlai Chandmary-ah mi in luahin an awm a ni.