Mizoram Health Secretary Pu R.Lalramnghaka leh State Level Expert Team te chuan nimin khan Aizawlah thuthar lakhawmtute kawmin inkaihhruaina an rawt sawrkarin a pawmpui dan chuan huap zau taka inkharkhipa mipui hnathawk thei lova siam chu Covid-19 dona atana daih rei tak anih loh avang leh mipui dinhmun thlir chungin zim zawka inkharkhip chu kalpui tawh tur ani dawn tih an sawi a, mass testing tihtawp tur anih thu leh inthlahdul tur tih chuan phal zau lam a neih loh thu leh hri darh tur venna atana inkaihhruaina tha taka zawm chhunzawm a pawimawh tih an sawi.
Tun ah chuan Covid-19 natna langchhuak bakah inendik tura hriselna lama thawktuten an tih leh hri vei nena inhnimhnai zual te chauh endik an ni tawh dawn a, hri avanga nunna chan hming te chu puanzar a ni tawh lovang. Hei bakah hian hri vei enkawlna damdawiin thuam chak kawngah chak taka hma lak ani dawn tih an sawi a, District tinah Covid-19 Care Wing din anih dawn bakah Lunglei District Hospital atan ICU khum 10 dah tum ani bawk.
Mizoram Health Dept Principal Director Dr F.Lallianhlira chuan RAgT Negative ni 5 chhung quarantine ni thin chu quarantine tawhloh ni se tih a ni a ti a, Symptom an nei anih erawh chuan RT-PCR emaw Truenat hmanga test leh tur anni tih a sawi a, Covid-19 hri vei natna langchhuak lo te chu mahni a inkhung hrang tura tih anni dawn ati a, Chhungkua a Home Isolation a awm te chuan Covid SOP tha takin an zawm tur ani tih leh chhungkaw member positive ve lo te chu a hnuah test tho tur anni dawn tih a sawi.
Mizorama COVID-19 hripui darh mek zirchiang tur hian sawrkar laipuiin a rawn tirh Multi Disciplinary Covid-19 Study Team chuan nimin khan Mizoram an rawn thleng a, nimin tlai dar 4:00 khan State Integrated Disease Surveillance Programme (IDSP) , Chief Medical Officer (CMO) Aizawl East leh Aizawl West a officer te nen an thukhawm nghal.
He meeting hi Dr.Pachuau Lalmalsawma, State Nodal Officer, Covid-19 in kaihruaiin, Aizawl District a Covid-19 dona a hmalakna chi hrang hrang an thlirin an zirho a ni.
Central Team Covid-19 zirtura lo kalte hian naktukah District hrang hrang a Chief Medical Officer te nen Video Conference an neih hnuah CMO, Aizawl West huamchhung a Covid-19 damlo te enkawlna hmun an tlawh ang a, naktuk October ni 7 ah Champhai District a Covid-19 dinhmun zirchiang turin Aizawl an chhuah san ang.