Chakma Autonomous District Council Sorkar a buaina thleng chuan ziaawmlam a panchho mek a, naktuk khian Chief Executive Member atan Pu Rashik Mohan Chakma chu lakluh a ni dawn.
Tuna CADC Sorkar MNF kaihhruai ah, Pu Rashik Mohan Chakma hi CEM engemawchen a nih hnu ah, kumin March 29 khan CEM atangin a banga, hemitum hi The Lawngtlai Post zawhna chhangin, Party chhungkuaah insiamremna a nih thu leh lungawilohna a neihloh thu a lo sawi tawh a, CEM atan Pu Durjya Dhan Chakma chu kumin April 6 khan lakluh a ni a, CEM nilai chuan tunthlan, ni 3 khan CEM atangin a ban ve leh tak hnuah Pu Rashik Mohan Chakma hi CEM atan Governor pawmpuitur a thawn chu Governor hian a lo pawm vangin, CADC, CEM atan lakluh a ni dawn ta ani.
Pu Rashik Mohan Chakma hi CADC a Politician langsar tak niin, kumin September 20 khan, MLA Pension leh MDC hlawh lakawpa puhna vangin, CADC Chairman chuan MDC a nihna a hlihsak a, heihi dan kalh a ni tiin, Pu Rashik Mohan Chakma chu Governor ah a chungchang an reldan a thlen hnu ah, Mizoram Governor chuan CADC, Chairman in Pu Rashik Mohan Chakma MDC a nihna atanga a ban chu a thuneihna piahlam a ni tiin, a pawmlova, hemihnu reilote ah CADC a MNF Legislature Party te chuan an Hruaitu atan Pu Rashik Mohan Chakma hi an thlangzui ta ani.
CEM a lakluhna hi a kaltuan chuan, Term khat chungin Pu Rashik Mohan Chakma hi Chief Executive Member tumhnih a ni dawn ani.