Health Minister Dr. R Lalthangliana chuan nikum anga inkharkhip boruak rit leh rapthlak tak tawng lo tur chuan tuna boruak tawn mek aia chhe lehzual thleng lo tura mi zawng zawng tan tlan a pawimawh a ni, a ti.
Inrinni zan a All India Radio Aizawl-a thuchah a puan chhuahah Dr R. Lalthangliana chuan COVID-19 vanga inkharkhip leh inkhuahkhirhna khauh tak sorkarin kalpui chhunga an tawrhna leh hrehawmnate hre reng turin mipui a ngen a. Khatih hunlai khan mitin mai an chep a, ei leh bar thlengin harsatna an tawk a ni a ti a. Khatiang hun mipuiin an tawn nawn loh na'n mi zawng zawngin mahni theihna zawn zawnah nasa lehzuala tan la thar theuh turin a ngen a. Tunah hian hripui leng thawh hnihna-in khawvel leh ram chhung hmun dang a tuam mek thu sawiin Minister chuan fimkhur thar a tul leh zual hle a ni a ti a ni.
Covid-19 insiam danglam thar E484Q leh L452R ti a vuah chu za zela 70 zeta kaichhawn awlsam zawk niin Minister chuan a sawi a. He hri insiamthar hian Mizoram a la rawn thleng rih lo niin lang mahsela tun hnaia hri kai thar hmuhchhuah sample 200 lai phai lam laboratory lianah endik tura thawn leh mek a nih avangin Mizoram dinhmun diktak a la hriat loh a ni a ti a. Chutih rualin nitin deuhthaw phai lam atanga lo haw hri kai hmuhchhuah thar an awm leh tawh a, eng chiah hi nge Mizoram dinhmun a hriat theih tak tak rih loh a, mithiamte thla a muang thei rih lo a ni, a ti.
He hri thar ziarang diktak hi mithiamte pawhin an la hriat kim theih loh avangin Mizoram chhunga chengte pawh a hma aia fimkhur lehzual a ngai hle niin a sawi a. Mizoram lo thleng ve lo tura theihtawp chhuah a tul rualin he thawh hnihna hi hmachhawn tura theih ang chinah lo inbuatsaih a ngai tih hi mithiamte ngaihdan a ni a ti. State dangte pawhin an lo inthlahdul tawhna te sutin a hma angin khauh lehzual zawka an kal mek lai hian Mizoram mipui pawhin awmhmuna an tih ve theih COVID hri kai lo tura nungchang dik - hmuituamna vuah that, kut silfai uluk leh midang nena inhlat a awm bakah sawrkarin inkaihhruaina a siam Standard Operating Procedure (SOP) te a hma aia uluk lehzuala awm thar leh a tul a ni tih hre theuh turin mipui a chah a. Hun tawng azirin SOP te pawh a tul chuan siamthat leh te pawh a la ngai hial maithei a ni, a ti bawk.
Hripui danna pek chungchang sawiin Dr R. Lalthangliana chuan Mizoram hian sorkar laipui atangin Covishield nuai 1, sing 2, sang 3 leh 730 dose a dawn tawh thu a tarlang a. Covid-19 hri danna dawn hnuhnun ber chu ni March ni 3 kha ni in dose 18,440 dawn a ni. dose hnihna tur hi dahthat tur tih a nih avangin March thla chhunga dose hmasa pek theih tur te chhutin district zawng zawngah sem darh a ni a, he mi hmang hian kum 60 chunglam te leh kum 45-59 inkar natna benvawn neite chu dose 19,297 pek tawh a ni, a ti.
Vaccine mamawhna hi sorkar laipui lamah pawh vawi engnge maw zat thlen tawh a nih laiin, pek belh hma in, March ni 23 a Review of Covid-19 vaccination Drive, Union Health Minister kaihhruaina-a meeting chuan vaccine 2nd dose tur hi dahtha lovin eligible beneficiary-te vaccine pe char char tura tih a rawn ni ta a, chu mi thu ang chuan April ni 1 atang hian 2nd dose tur a dahthat te chu kum 45 chunglam te chu vaccine hi pek tan an ni. Vaccine dawn tur ang dawn kim vek a nih theih na'n sorkarin theihtawp a chhuah a ni tih a sawi bawk.