Lai DCC thuchhuah

OFFICE OF THE LAI DISTRICT CONGRESS COMMITTEE
Headquarters : Lawngtlai Congress Bhavan, Bazar Veng - 796891
PRESS RELEASE
PR.No. 01/2021

MIZORAM CHIEF MINISTER HIAN T.J. LALNUNTLUANGA HI A MINISTER NIHNA ATANGIN BAN RAWH SE.

Lawngtlai, 16th March, 2021:  Mizoram Assembly Session neih lai meka date 12th & 15th March 2021 chhuna Pu C.Ngunlianchunga Lawngtlai West MLA in Minister pakhatin a sawi “Covid 19 laka kan la him theih chhan chu Chief Minister in Pathian a tihna vanga a hriat thu…” Vanglaini Daily News Paper a tih chhuah chungchang a sawi zuinaah Pu T.J. Lalnuntluanga chuan mawi lo takin Democracy kalphung leh Parliamentary Ethics pawh hre hauh loin, Dy.Speaker in Lawngtlai West MLA hun a pek chhunga a thusawi lai chu nasa takin ti buaiin a au khum a, MLA hian thu sawina hun pawh a nei meuh lo a ni. 

 

Hetianga House chhunga Dy.Speaker in zalen taka T.J.Lalnuntluanga thusawina hun a pe hi House a control zawh loh zia a ti lang chiang hle a, Session conduct zui zel tlakah Lai DCC chuan a ngai lo a ni. Pu T.J.Lalnuntluanga hian House chhunga a tih buai chu duhtawk loin, Session zawh hnuah House pawn lam thleng thlenga a umzuia insual ngama a ti buai zel mai hi Mizoram Politcal History ah a vawikhatna a ni a. Hetiang taka Parliamentary Ethic pawh hre lo Dan hre mi hi a awm theih dawn em ni tih hi mipui rilru a ni a. Hetiang mi Democracy kalphung leh Member te zahawmna piah lama an Rights pawh hre loin Law & Judicial Department bakah Parliamentary Affairs Minister nihna a chelh hi Lai DCC chuan zahthlak a tiin, Mizoram rorelna sang ber Inpuia thleng a tan chuan pawi a ti a, a dem takzet a ni. Pu T.J Lalnuntluanga hian ram buai laia MNF te chetdan kha a hrepha kher lo a nih pawhin Assembly House chhung leh pawnah hian tih lan kher tum tawh lo se la, a Pa rual, Politics ah pawh senior zawk Pu C.Ngunlianchunga hi House chhungah ngei ngaidam dil rawh se.

 Hetiang taka phunglung, aia upa zawkte zahna chang pawh hre lo MLA Mizoramin kan nei hi a pawi kan ti a, Mizoram Sorkar hi a mualpho lohna tur leh Memberte zahawmna leh dikna vawnhim zel a nih theih nan kan Chief Minister zahawmtak hian Pu T.J.Lalnuntluanga hi a Minister nihna hi hlih sak rawh se. A hlip ngam ngang lo a nih pawhin hetiang miphunglung hian Law & Judicial Dept leh Parliamentary Affairs Dept hi chhuh sak nghal turin kan phut tlat a ni.

 Pu C.Ngunlianchunga huaisen taka kan ram tana kal zel turin duhsakna kan hlan a che.
 
Sd/- (L.LALRINAWMA)
General Secretary
Lai District Congress Committee, Hqrs: Lawngtlai