Tunhnai a Lawngtlai District chhung, Diltlang South a Vawk damlo te chu natna hlauhthawn- awm a nihloh thu LADC a AH & Vety mithiam ten an sawi.
Diltlang South ah hian tunhnai ah Vawk damlo a awm nual a, LADC a Executive Member AH&Vety changtu Pu Sanghuliana Mualchin chuan, mithiamte a tir a, niminpiah khan Dr. Lalnunpuia Chinzah hovin vawk damlo te hi endikin, sample te lain endik a ni a, heng Vawk damlote hian African Swine Fever emaw Classical Swine Fever an veilo tih finfiah a ni.
LADC a AH & Vety mithiam te hian ran vulhtute hnen ah ran enkawldan te zirtir nghalin, damdawi an mamawh tur angte a thlawnin an sem nghal a, ran dang damlo te pawh en nghal bawk.
Dr. Lalnunpuia Chinzah chuan LADC chuan ramdang nen ramri intawm thuitak a nei a, ramdang atanga ran lakluh chu dankalh a nih thu sawiin, mipuite chu an ran vulh ah harsatna an neih ah, LADC a AH & Vety Department chu an mahni tanpui turin an inpeih reng a ni a ti.