Sorkar thuchhuahin a tarlandanin, State pawn atanga Lawngtlai District-a lo haw leh lo lut, COVID-19 hri leng laka fimkhur thila government quarantine facility leh home quarantine-a khung hran mek leh COVID-19 positive enkawl mek zat chu nimin tlai dar 5:00 thleng khan mi 40 a ni a. An zinga mi 3 (COVID-19 positive) chu Lawngtlai Covid Care Centre (CCC)-a enkawl niin, mi 37 chu home quarantine an ni.
Niminpiaha District Hospital Lawngtlaia Rapid Antigen Test hmanga COVID-19 positive hmuh chhuah thar mipa 1 chu Lawngtlai CCC-ah dah a ni a. Lawngtlai District-a swab sample lak, Zoram Medical College (ZMC)-ah RT-PCR test hmangin sample 1,335; District Hospital Lawngtlaiah TrueNAT hmangin sample 2,510 leh Rapid Antigen Test hmangin sample 6,609 endik tawh a ni a. Tun dinhmunah positive case 331 hmuh chhuah tawh niin, dama chhuak 329 an awm tawh a. Positive enkawl lai Lawngtlai CCC-ah 2 (mipa leh hmeichhia) an la awm.
COVID-19 hri danna Covishield chu Lawngtlai District-a healthcare worker-te'n January ni 19, 2021 atang khan la tanin, District Hospital Lawngtlai, Sangau PHC, Lungpher 'S' PHC, Bualpui NG PHC, Chawngte CHC leh Borapansury PHC-ah te pek a ni a, a pumpuiah mi 523-in hri danna hi an la tawh a ni.