Kan khawpui a thang a, kawngpui ah lirthei chhuakthar tha tak tak a inpel suau suau a, kan thalaiten Online Games an khel a, nu leh pa ten Social Media hmangin thian an kawm a, a nawlpui a hun kan hmandan atang hi chuan Pi leh puten faisa ringa khawsak an lo suangtuah thin let tamtakin tunlai nun hi a nuam tawhin a rinawm.
Hetiang a kan awmmek lai hian, tute hnen atanginnge kan mamawh kan lak a, tutenge tui min chawisak a, tutenge hlawhfa atan kan chhawr thin tih hi mipangngai chuan a ngaihtuah a hun viau tawh in a hriat a ni.
Inchimralna ah hnam ziarang leh tawng a bo hi thil hlauhawmloh a ni lova, a boloh nan hmalak chu tihtur, tihngei ngei tur a ni, hetihrual hian, inchimralna ah chuan ei leh bar zawnna a inchimralna hi a hlauhawmber a ni hial ang.
Lawngtlai ah hnamdang sumdawng an tam tih hi titi a sawi sawi hian awmzia a neih hun a nghahhlehawm a, a ram leilungfaten sumdawnna an khuahkhirh theih hun a thlentheihna tur atan erawh, a kalkawng hi thuitak anga lang, tawite si a nihna lai a awm a, chu chu, hnam thinlungput a ni.
Ali-a, a hna vanga zing dar 5 a thawhtheih chuan, engvanginnge, a ram neitu zawk dar 5 hmain a thawhtheihloh bik ang ? Vai dawrkaiin anmahni dawrtute thataka a lo dawnsawn theih chuan, kan theihlohna tur a awmlo. Rimtaka kan thawhchhuah te hi keimahni ah a lut leh em tih chhut ila, inchimralna hi kan hmachhawn mek em tih hi zawhna chhan har a nih a rinawmloh.