Nimin khan MNF District Hqrs Lawngtlai a Thalai pawl leh Women Front ten LADC Sorkar a BJP Executive Member te Office kaitur an dan chhunzawm a, an hruaitu mi 11 te Police ten an la hrang a, BJP Legislature Party hruaitute chuan an sorkar chu tualchhar a fiah chi a ni lo anti.
MNF Thalai Pawl leh Women Front te hian LADC a BJP Sorkar chu member nei ngah tawklo chung a Sorkarna kalpui luiah puhin bangturin an nawr mek a, nimin khan LADC a Executive Member, BJP MDC te Office kaitur an lo dang tawh a, nimin khan MDC te bak ah LADC Staff te pawh dang telin, chawhma lam khan MNYF President Pu Elvis Lalthangzuala hovin mi sawmpakhat Police ten an lakhran hnu ah Staff te chu Office kaitir nimahse, MNF hruaituten an ngenna vangin Staff engemawzat chu an haw leh. BJP Member Office kaiturte chu dan chhunzawmin, Police nen innawrna tlem a thlen hnu ah Executive Member te hi Office kailovin an haw leh.
MNYF President Pu Elvis Lalthangzuala chuan BJP MDC te chu LADC thuneihna diklo taka a kalpui ah puhin, Mizoram Governor in BJP MDC te a hum tlat chu hriatthiam har an tih thu a sawi
Nimin chawhnu khan BJP Legislature Party te hian BJP Office Lawngtlai ah Thuthar lakhawmtute kawmin, BJP Legislature Party Deputy Leader Pu C.Lalneihkhuma chuan MNF ten an Office kaitur an dang thin chu pawi a tih thu a sawi a, BJP Legislature Party chuan thlawptu a neihdan chu tualchar a fiah chi a nihloh thu leh, dan angin House ah fiah an ngam thu a sawi a, hetia hnathawkthei lova indan buaireng chu ram hmangaih-tute tan chhunzawm zel chi a an ngaihloh thu a sawi.
BJP MDC te chuan Office kai ni a nih phawt chuan ram leh hnam tan an hna chhunzawm turin Office kai an tum zel tur thu an sawi a, MNF Thalai leh Women Front lam pawn LADC a BJP Sorkar chu an ban hma chuan Office an kaitur dan chhunzawm an tum thu an sawi.