LADC Sorkar dinglaiin thlawptu a neihdan fiah tur a tihna Mizoram Governor atanga Deputy Chairman in Lehkha a hmuh chungchangah nimin khan LADC chhunga Political Party tin President te leh Legislature Party Leader theuhte Dy. Chairman Pu LR. Dingliana Chinzah chuan meeting a neihpui.
Lai Autonomous District Council ah hian Congress Legislature Party chuan kumin October Ni 16 khan BJP Legislature Party dinin, rorelna an chelhzui a, BJP zawm ve theilo Congress MDC 6 ten October Ni 23 khan BJP Legislature Party an thlawp ve theihloh thu CEM hnen ah thlenin, LADC Sorkar a nihna an neih pawh hemi ni hian an bansan nghal a, Kumin June thla ah khan Congress Member MDC 4 ten Congress Legislature Party an lo chhuahsan tawh bawk ani. Lai Autonomous District Council ah hian Mipui thlan MDC 25 awmin, sorkarna siamtur chuan MDC 13 an neih angai a, Congress Party atanga BJP zawm ta, tuna BJP Sorkar chuan, Sorkarna siam thei MDC an neilo tiin, Sorkar bukna, Floor Test neihsak turin Mizoram Governor hnenah ngenna thlen a ni a, Mizoram Governor chuan Deputy Chairman chu BJP Legislature Party in thlawptu a neihdan fiahturin a rawn ti ta a ni.
Nimin a Political Party hruaitute leh LADC a Legislature Party hrang hrang hruaitute, Deputy Chairman hova inhmukhawm chuan , Governor in Floor Test nei tura a tihna chu tha an ti a, Dy.Chairman chu a rang lama Session ko tura an duhthu an sawi a,Dy.Chairman chuan Session hi harsatna dang a awm lo anih chuan tunkar Zirtawpni a koh tum anih thu a sawi.