Lawngtlai District Hospital a Covid 19 hri kai leh kailo enfiahna, TrueNAT Laboratory chu vawiin atang khan hmantan a ni a, nimin khan Sample pathum enfiah a niin, tunhnai a District hrang hrang a TrueNAT khawl Sorkar in a dah zing ah Lawngtlai chu a hmang hmasa ber a ni.
TrueNAT Laboratory hi hmantan a nih hma in, nimin khan Lawngtlai District MJA te chuan an tlawh a, Medical Superintendent, Dr. Zothanpari Chhakchhuak chuan, an Loboratory chu ICMR in hman phalna an pek tawh thu sawiin, an khawl chu TrueNAT Quattro niin, vawikhat ah a rualin sample pali enfiah theih a ni dawn a, hnathawhhun pangngai anga chhutin, nikhat ah Sample 20 atanga 30 vel enfiah hman an inbeisei thu thuthar lakhawmtute hi a hrilh.
Lawngtlai a TrueNAT Laboratory Doctor, Dr, Paul Lalchungnunga chuan Laboratory chhunga hnathawhdan tur leh MJA lam ten hriatduh an neihte a hrilhfiah a, Laboratory chu ICMR duhdan ang thlap a siam a ni a, pawnlam mitan leh a chhunga hnathawktute tan himlohna tur a awm lo a ni a ti.
Lawngtlai a TrueNAT Quattro hmang hian, tun dinhmun ang a Sample lak hi kar khat ah sawm hnih sawm thum vel a nih chuan, hmundang pawtbuai lovin, Lawngtlai District a Sample lakte chu result hriat zung zung theih tur a ngaih a ni a, Sample pakhat endik hunchhung hi darkarkhat vel anga chhut niin, result hi thuneitu sang lam ten puanchhuah an remtih hnu ah District Information & Public Relations Officer in mipui hriattheih in a puangzar thin dawn a ni.