DM&R leh Home Secretary Pi Lalbiaksangi’n nimin khan Lawngtlai a tlawh.

      Mizoram sawrkara Home Department leh Disaster Management & Rehabilitation Department Secretary Pi Lalbiaksangi chuan nimin  khan Lawngtlai tlawhin, District Emergency Operation Centre dinhmun a enfiah bakah,   District thuneitute    leh District Jail thuneitute nen inkawm ho bawk.

        Home Secretary hi Lawngtlai DC, Dr Andrew H. Vanlaldika,  leh mi pawimawh dangte'n an lo dawngsawng a. DC Chamber ah  Home leh DM&R hnuaia Lawngtlai District-a hma lakna tur hrang hrangte an sawi ho va. COVID-19 hri leng mek dona kawnga  Task Force  hna thawh dan leh Lawngtlai District dinhmun te an sawi ho bawk.

 
     DM&R Secretary hian  rikrum thila hman tur hmanraw hrang hrangte a enfiah a. District thuneitute chhiatna a thlen thulh a hmanraw mamawh an neih te an lo thlen nghal a ni.

 

         Home Secretary hian Lawngtlai District Jail tlawh a tum chu Lawngtlai daia kawngpui zauh hna thawh mekah ruah sur vanga lei tawlhin kawng a hnawh avangin a tlawh thei ta lo va. District Jail thuneitute nen Bawrhsap pisaah inkawmin, Superintendent of Jail Pu HC Lallianvuta chuan District Jail dinhmun leh an mamawhte a hnenah hian a thlen a. Home Secretary chuan a theih anga an mamawhte ngaihtuahsak a tum tur thu lo hrilhin, jail tangte chawhmeh lei nan Jail Supt. kutah pawisa fai a hlan bawk.