Zoram Thar Hruaitute chuan Rev Dr. Zaichhawna Hlawndo kaihhruaina in Mizoram chhim lam an fang mek a. January ni 7 khan Lungleiah riakin Zofate Lairelna Conveyner ruatte nen an inkawm a, February ni 7-8 ah Lungleiah Zofate Inpumkhatna beihpui thlak nise tih an rel.
Nimin khan Lawngtlai Press Club ah thuthar thehdarhtute kawmin Rev.Dr. Zaichhawna Hlawndo chuan Zofate hi kum tam tak kan lo bo tawh avangin kan hnam nihna (National Identity) pawh hrelovin kan awm a. British, Burmese leh India ten nihna hming hrang hrang min pek hmangin kum tam tak min then hrang a, min indo tirin min awpbet a ni a ti. Zofate hi kan Inpumkhat thuai loh chuan chimralin kan awm vek dawn a. Ka nihna dik tak- Thlah khat ; Hnam khat ; Pathian Pakhat; leh Sakhaw pakhat betu kan nihna ah hian kan harh thuai a ngai a ni a ti. Kum 2020 hi Hnam Lirpui nghin tan kum a ni a, chibing indaidanna hi kan thiah thuai a ngai. British leh India in chibing in hungna bang chhah tak hi tuman min thiah sak dawn lova keimah nin kan thiah a ngai a ni a ti. Hnam hrui khat kan vawn hunah Lalpan kan awmna tur dik takah min dah tawh dawn a ni a ti. Kumin November ah hian Zofate haw runpui Inkhawmpui buatsaih tum a ni a ti bawk.