Boruak nuamtak hnuai ah Krismas leh kumthar hman a ni

         Boruak nuamtak hnuai ah Lawngtlai District mipui ten Krismas leh kumthar an hmang zova, nunphung pawh a pangngai chho tan leh tawh.

           District chhung khawihmun atang mahin thil duhawmlo liantham thleng hriattur a awm lova, urlawk zan leh kumhlui thlahzan ah Police ten nunphung pel a khawsa mi panga ve ve an man te pawh a tuk ah intiamkamna ziahtirin chhuah leh nghal an ni.

           Kohhran hrang hrang ten Krismas leh kumthar ah ruai hlim takin an theh a, Krismas chu ruai nen a nawn awm nual mahse, kumthar lawmna ruai nen a nawn an tam zawk in a hriat a, kar kalta Inrinni thleng khan ruai nen a kumthar lawm chhunzawm hriattur an la awm a, Kohhran tam zawk chuan Krismas leh kumthar lawmna Programme an khar tawh laiin, nizan lam thleng a zaikhawm a Pathianfak thawm hriattur a la awm.

           

Hunpui vuatvet ah boruak duhawmlo thleng palh thei vengin Police leh YLA te ngawrh takin an duty thin a, Lawngtlai SP mawhphurhna latu, Pu C.Lalruatkima Addl. SP chuan boruak muanawm tak hnuai a hunpui hman a ni chu Tlawmngai pawl leh Village Council te Police lam nen an thawhhona a that vang tih sawiin lawm thu a  sawi a, mipuiten dan leh thupek an zawm tha hle tih a sawi bawk.