Branch YLA te infiamna, Lai Cup-2019 chu nimin atang khan tan a ni.

     

           Lawngtlai District a Infiammi punkhawm tamna leh Football leh Volleuball a lawmman tamna ber, nimin khan NECS leh Central YLA buatsaih, NECS Lai Cup 2019  (Inter Branch YLA Football & Volleyball) chu Central YLA Playground, Lawngtlai-ah  tan a ni.

He hun a  Khuallian, Lawngtlai DC,  Pi Shashanka Ala, chuan  Lawngtlai District-a thalaite leh Laifa te tana YLA leh NECS tangkawpin Lai Cup a buatsaih chu lawmawm a tih thu sawiin hun nuam leh hlimawm tak hmang turin duhsakna a hlan a. Lawngtlai District thalaite chu ruihhlo laka inthiarfihlim a, infiammi hlawhtling, ram leh khawtlang tana mi tangkai ni tura sawmin NECS Lai Cup 2019 a Kick off nghal bawk.

Report-a a lan danin tun tum NECS Lai Cup 2019-ah hian Football (Mipa)-ah Branch 37, Volleyball (Hmeichhia)-ah Branch 10 an tel a,  Lawngtlai District Football Association  leh Lawngtlai District Volleyball Association te nen tang hova ruahmanna siam niin Football-a champion hian cheng nuai khat  leh trophy leh certificate dawngin, pahnihnain Rs 50,000/- leh certificate an dawng ang a, lawmman tesep dang siam a ni bawk ang. Volleyball-a champion-in Rs 30,000/- leh trophy leh certificate dawngin, pahnihnain Rs 10,000/- leh          certificate an dawng ang a, lawmman tesep dang siam a ni bawk dawn a ni.