India Hnam Pa Mahatma Gandhi pianchampha phak puala kum tina neih thin October ni 2-9 awh tur Faina Hapta chu Lawngtlai District tan nimin zing khan Areopagy-ah LADC -a LAD changtu Executive Member Pu H. Chhuanawma'n a hawng.
Pu H. Chhuanawma chuan kum tin faina hapta hman thin leh sawrkar leh tlawmngai pawl atanga hma lakna hrang hrang avangin Lawngtlai khawpui chu a fai tawh viau tih sawiin, hma sawn zawnga ke pen zel erawh a la tul a ni, a ti a. Mihring hriselna leh ram leilung tana plastic hnawksakzia inzirtirna kalpui mek chu a taka zawmtu leh nunpuitu ni theuh turin kal khawmte chu a chah a. Thlen tawh china lungawi mai lo va, rahbi thar kai zel tum turin a fuih nghal bawk.
Lawngtlai UD&PA-a District Project Officer Pi Rochuangkimi Khenglawt kaihhruai ah hian 'Swachhata Hi Seva' (Fai Hi Rawngbawlna A Ni) hma lakna hnuaia 'plastic hmang lo tura intiamna' (Pledge for a Plastic Free India) chham rual a ni a. Lawngtlai DC, Pi Shashanka Ala pawhin faina lam hawi thuchah a sawi a,Nehru Yuva Kendra bul tuma Fit India Campaign puala zing tlan paha plastic bawlhhlawh chhar fai tura chhuak youth club-te zinga member chhuak tha zual Club 5 hnenah infiamna hmanrua pek an ni.
He hun hmanah hian sawrkar official-te leh tlawmngai pawl hrang hrang bakah, zirlai naupangte telin, hawnna hun hman zawh hian hmun thumah inthenin khawlai dunga bawlhhlawh then fai hnatlang neih zui nghal a ni.Kumin faina hapta pual hian Lawngtlaia sawrkar office fai, sikul fai leh hotel/thingpui dawr fai thlan a ni leh dawn a. Heta thlan chhuahte hi October ni 9-a faina hapta kharnaah lawmman hlan an ni ang.
Hetih lai hian Mizoram khawpui fai inelnaah kum 2019 atan Lawngtlai chu district headquarters zingah 5-na niin, khawpui zawng zawng zingah 9-na a ni bawk.
Tags
News