Khawpui dang ang bawkin, Lawngtlai hi khaw hrang hrang atanga pem khawm, awmhmun bengbelta tamna a ni a, heivang hi a ni thei angem, neitu thinlungpu a enkawl ni a ngaih hleihtheihloh hmuhtur leh hriattur a awm fo hi a vanduaithlak ngawt mai.
Khap kher ngailova, mipangngaiin a tih duhloh tur ang chi a awm thin te hi a pawi a, khawpui daifem a, kawngpui kam a leivung leh bawlhhlawh paih ngawt maite hi, neitu rilru pu a khawpui a khawsa tan chuan thil tih chi niin a langlo.
Hetiang ang chi , thil dang pawh, neitu thinlungpu tan a tih awm a langlo hi a awm thei nual ang. Khawpui dang a, Car tukverh atanga thil eina bawm leh tui bur ruak thehchhuak duhlo khan, engatinge, Lawngtlai a nih vanga heng hi pawisa lemlo kan awm tlat thin, tih lai hi kan mutan lian tak niin a hriat a, a bulber ah chuan, neitu ah kan inngaihloh vang a ni ngei ang. Tunge mahni tualzawl ah, bawlhhlawh paihdarh mai mai duh ang.
He khawpui a chengte hian, keini ho bak hi enkawltu a neilo, kan ta, kan khawpui, kan hmel lanna a ni a, Lawngtlai a mawi hian, nang leh kei hi kan mawi a, Lawngtlai hi a neitu kan nihna angin enkawl a tul khawp mai.
Tags
Editorial