ṬKP Electric Veng Unit Lawngtlai te'n an kum 36 tlin pualin thisen an pe.

     Ṭhalai Kristian Pawl (ṬKP), Electric Veng Unit, Lawngtlai chuan an kum 36 tlinna (Rising Day) pual leh Lawngtlai Area Ṭhalai Kristian Pawl Coordination Committee (LAṬKP)-in kum 2022 chhunga Lawngtlai Area chhunga ṬKP-te'n a thlawna thisen pek runpui an inbuatsaih chhawk dan tur calendar a siama thisen an pek thla a nih angin vawiin khan BCM Electric Veng Kohhran Hall-ah thisen an pe a. Thisen hi District Blood Bank, Lawngtlaia thawktute'n a hmunah kal chilhin, an laksak a ni.

    Thisen pek ṭanna hun hman chu Unit ṬKP Assistant Secretary Pu Fc. Lalhualhima'n kaihruaiin, Bible a chhiar bakah, Pathian hnena lawm thu sawi ṭawngṭai hun a hmang a. LAṬKP ai awhin Assistant Secretary Pu Teddy Lalrinliana Aineh leh AVBD ai awhin Committee Member Tv. Lalremruata Khawlhring te'n thu an sawi bawk.

    Vawiina an Unit din champha phak pual leh LAṬKP calendar anga thisen pek runpui an buatsaihah hian ṬKP Electric Veng Unit, Lawngtlai chuan thisen unit 33 an pe a. Thisen petute hi mipa 27 leh hmeichhia 6 an ni.
   
    ṬKP Electric Veng Unit, Lawngtlai hi kum 1986 September ni 7 khan din a ni a. Tunah hian member 316 an awm mek a ni.