Stand up Lawngtlai (Tho Law Dir Tuah) hnuaia hmalakna kalmek hnuaiah Lai Autonomous District Council hnuaia Sanitation & Waste Management Department ruahmannain tukin khan Areopagy , Lawngtlai ah Lawngtlai khawpui chhunga sikul hrang hrang hnenah bawlhhlawh bawm, LADC a Executive Member, Sanitation & Waste Mangement enkawltu Pu JB Vanhoy chuan a sem.
Pu JB Vanhoy chuan Zirlaite thinlungah Faina leh thianghlimna tuh chu Sorkarin a duhber tih sawiin, awmzenei a faina leh thianghlimna ah hmalak a ngai a, bawlhhlawh thliarhran chu Supreme Court pawhin a ngaihpawimawh a nih thu sawiin, thil a nihdantur angin la tivek theilo mah ila, kan phak ang tawka helam hawia hmalak chu LADC Sorkarin a dah pawimawh hle a ni, a ti.
Executive Member Pu JB Vanhoy hian Lawngtlai khawpui chhunga Primary School, Middle School, High School, leh Higher Secondary School 31-te hnenah bawlhhlawh bawm Dry leh Wet 50 a hlan.
He hun kaihruaitu Pu C.Lawmsangzuala, Sanitation & Waste Management Officer chuan he hmalakna hi a theih ang angin LADC Sorkar chuan chhunzawma, semchhuah tawhte pawh hmanzui a nihdan Sorkar chuan a vilzui tur thu a sawi a, LADC Sorkar in Faina leh Thianghlimna lama hma a lakna ah thurawn englaipawhin an dawn theih reng thu leh tanrualna atangin hmalakna chu hlawhtling thei a nih thu a sawi.
He huna tel School lama hotute chuan LADC Sorkar hmalakna chu fakawm an tih thu an sawia, School lam ah pawh uar leh nasa zawk, awmzenei zawka faina lama hmalakna kalpui chhunzawm an tum thu an sawi.