Vawiin khan District Programme Office, (WCD) Lawngtlai District-bultumin Areopagy Lawngtlai Bazarah 'International Day of the Girl Child 2026' leh 'Project Thaichhawninu Free SSY Account Opening Drive Programme' ,Pu H. Zonunmawia, PD (DRDO ) hovin hman ani.
Pu H. Zonunmawia chuan an hun hman chu hmeichhe naupang zawng zawngte dikna, zahawmna, an thiamna leh an chanvo tarlanna pawimawh tak a ni tiin khawvel pawhin a ngaipawimawh hle a ti. Kum tlinglova pasal neih a pawi thu sawiin, kum tling ngeia pasal nei tura hmalak chu khua leh tui tha nihna a nih thu a sawi a. Hmeichhiaten hleilenna an tawh lohna tura thawh te, tanpui an ngaihna zawna tanpuite hi mitin kutah a innghat a, helam hawia ke pen turin a sawm a. Hmeichhe naupang tinte hian zirna tha, hriselna leh inenkawlna tha bakah inhumhimna tha an neih a pawimawh tak zet a, Sawrkar pawhin theihtawp a chhuah reng a, Hmeichhe naupangte hi chhungkua, ram leh hnam hmalam hun atana beiseina êng an ni a ti.
Project Thaichhawninu chungchang sawiin Pu H.Zonunmawia chuan Fanu zawng zawng tan an fanu hmasawnna leh hmalam hun atana sum vawnna pawimawh tak a nih avangin an fanute tana 'SSY Account' hawng turin a sawm.
Vawiin hun hmanna hi Pu V. Vanlaldingliana, Asst. DPO (WCD) chuan kaihruaiin, Pi J. Lalremkimi,OSC leh Pu John Lalpektluanga, Post Master, ten thutawi an sawi. Pi F. Lalengvari, DMC,DHEW-DPO (WCD) chuan lawmthu sawiin hun a khar.
Hun hman zawh hian 'Free SSY Account' hawnna neih chhunzawm nghal a ni a. Free SSY Account - hi hmeichhe naupang kum 10 hnuailam tan hawn theih niin, Minimum Deposit - Rs. 250 per Year; Maximum Deposit - Rs. 1,50,000 per Year niin kum 21 hnuah lakchhuah theih a ni.