Mampui rama Greenfield Airport siamdan tur vawiin khan a hmunah mithiam ten an enfiah.

Vawiin khan Airport Authority of India chuan Lawngtlai bul, Mampui rama Greenfield Airport siamdan tur a hmunah an enfiah.

Airport Authority of India atanga mithiam miparuk rawn kalte hi Pu Khushiya Singh, DGM (CNS) chuan hovin, Mizoram Sorkar hnuaia GAD Aviation atangin Superintendent in a rawn tawiawm a, Lai Autonomous District Council atangin Chairman Pu  C.Lalmuanthanga leh bialtu MDC Pu LR Dingliana Chinzah ten  a hmunah tawiawmin, District Administration leh LADC atangin mipawimawh dangten an tawiawm bawk.

Airport Authority of India  atanga kalte hian Mampui bulah Greenfield Airport siamtheih a nih dawn leh dawnloh enfiahin, ramhnuai pilril deuh thlengin an luta, an ngaihdante chu Airport Authority of India  thuneitu sangah an thlen ang.

LADC Chairman Pu C.Lalmuanthanga chuan Airport Authority of India  ten LADC huamchhungah Thlawhna tumhmun tur an en chu lawmawm a tihthu sawiin, hmalakna kalzelturah Council anga tangkaina an neihahte LADC chuan theihtawp a chhuah tur thu Airport Authority of India  hotute hi a hrilh.

Heng Airport Authority of India  atanga lokalte hian vawiin chawhnu khan Lawngtlai Bawrhsap Pu Donny Lalruatsanga pawh hmuin an hmalakna tlangpui an hrilh a, Bawrhsap chuan Lawngtlai District ah Airport a awm ngei theih nan theihtawp chhuah turin a sawm.