Central YLA leh 23rd Assam Rifles te ṭangkawpin YLA Tuithumhnar Sub. Headquarters huamchhunga khuate tana Disaster Management Training an buatsaih chu Assam Rifles Company Operating Base, Zorinpuiah Central YLA Vice President Pu T. Rohlupuia hovin nimin khan khar ani.
He training kharna hi Lt. Col. Sahibjit Singh chuan kaihruaiin YLA te nena thawhhona ṭha an neia, hetiang training an pe thei chu lawmawm a tih thusawiin tun hi first batch an ni a, mamawh dan ang zelin training hi kalpui zel an tum bakah hun lo kal leh zel turah pawh an Operational Area chhunga NGO te nena thawhho zel an tuma, tualchhung miten rikrum thila an mamawh a nih phawt chuan engtiklai pawhin chechhuak turin an peiha, a rang thei ang bera hrilhzel turin a ngen.
Central YLA Vice President Pu T. Rohlupuia pawhin thusawiin training hlawkthlak tak neih a ni chu a lawmawmin training tura mahni hna ṭul kalsana inpe, YLA member te chungah lawmthu a sawi.
Central YLA Secretary (i/c Western Zone) Pu Malsawmtluanga pawhin thusawiin hetiang hun ṭha hi bawhpelhlo a, training zel turin leh rikrum thil a lo thlenin an training ang ngeia che chhuak ṭhin turin member te a fuih
He training ah hian branch hrang hrang aṭangin YLA member 24 te an tel theia. Training a tel te hian hetiang training hi an vawikhat neihna a nih thu leh rikrum thilah pawh an ṭangkaipui dawn thu leh hlawkthlak an tih thu an sawi
23rd Assam Rifles te hian he training a tel YLA Branch te tan Tuithumhnar Sub Headquarters hruaitute hnenah suahdur 25 leh Search Light 10 an pe.
He training kharnaah hian Tuithumhnar Sub Headquarters Office Bearer ten CYLA hruaitute hi an ṭawiawm bawk a ni.