Lai Autonomous District Council a Chief Executive Member leh Lawngtlai Bawrhsap chuan Lawngtlai khawpui leh District in hma a sawn theih nan theihtawp chhuah dun an duh thu an sawi.
CEM, Pu C.Lalsawmzuala leh Bawrhsap Pu Donny Lalruatsanga te hian nimin tlai khan Chawnhu a Zotlang Forest Park ah zanriah kildunin, Lawngtlai khawpui leh District hmasawnna tur hrang hrang an sawidun a..
CEM chuan Lawngtlaiin Bawrhsap thatak, ram leh khawtlang vei em em an nei chu lawmawm a tih thu sawiin, hmasawnna atana tihtheih, LADC in a neihah te theihtawp an chhuah tur thu leh a theih ang angin tunah pawh hma an lakmek thu sawiin, Drug Free District campaign ah pawh an phak ang tawka hma an lak tan tawh thu a sawi a, khawpuia lirthei dandan a mumal zawk nan chaktakin hmalak mek a ni bawk a ti.
Bawrhsap chuan Lawngtlai khawpuiin hmelthar a neihtheih nan a duan Thaw law dir tuah (Stand up Lawngtlai) leh Drug free District hmalakna piahlamah hmalakna kalmek leh hmachhawp awm nual mahse, LADC nen pheikhai rual taka an kal chho mek chu phurawm a tih thu sawiin, thil tak tak sualchhuak tur chuan tanrualna a pawimawh a, helam hawia ke pen hrehlo CEM an nei chuan ruahmanna leh hmalaknate a hlawhtlin theih nan awmzia a nei thui thei hle dawn a ni a ti.
CEM leh Bawrhsap zanriah kildunna ah hian LADC a Executive Member pathum Pu Lalropuia Chinzah, Pu JB Vanhoy leh Pu HC.Lalengkima bakah LADC a Transport officer leh I&PRO leh MJA Lawngtlai District hruaitute an tel.
Tags
News