Lai Autonomous District Council a Chief Executive Member, Pu C.Lalsawmzuala chuan Media thangzelah, Chanchinbumite zahawmna leh hna humhim kawngah MJA Lawngtlai District kaldan chu chhuanawm a tih thu a sawi.
Vawiin khan MJA Lawngtlai District chuan MJA Member lo nitawh, CEM dinhmun luah thei zinga pahnihna Pu C.Lalsawmzuala chu lawmpuina thilpek pein, duhsakna an hlan bakah CEM Relief Fund ah Rs. 5,000/- (Sangnga) an chhunglut a, MJA President Pu Elvis Lalthangzuala chuan Pu C.Lalsawmzuala chu Journalism khawvel atanga Politics a zuanglut a, ram Nu leh Pa ber dinhmun a luah thei chu MJA Lawngtlai District ten an chhuang hle tih a sawi.
CEM Pu C.Lalsawmzuala chuan MJA Lawngtlai District ten Chanchinbumite tihtur leh tihlohtur zahawmtaka vawngnung chunga an hna an thawk thin chu chhuanawm a tihthu sawiin, tullova mipui tiralkhela, ti chiai thei lam te, boruak duhawmlo hringchhuak thei zawnga thu thehdarh kawngahte rilrufim an pu tlat thin chu a zahawm hle a ni a ti.
CEM chuan Media thangzelah Journalism khawvel chu a nawlpuia luhchilh a nihtak vangin Journalist te hlutna a zual nasain, thahnemngai zawka tan la sauh sauh turin MJA Member te a fuih.
CEM hi LADC a Information & Public Relations changtu Pu Lalropuia Chinzah in a tawiawm.
