Vawiin khan Lawngtlai Bawrhsap Pu Donny Lalruatsanga chuan Lawngtlai khawpui chhunga Anganwadi Centre- te a hmunah kalin a enfiah a, Women & Child Development Department- hotuten an tawiawm a ni.
Pu Donny Lalruatsanga chuan Anganwadi chu naupangte tana a tangkaiin a hlu em em a ni, a ti a.Thawktute inpekna ropui a tih thu tarlangin hmangaihna nena thawk zel turin a fuih a ni. Anganwadi - a thil chi hrang hrang an zirte chu nakina school an luh thleng a an chhawn tur a ni a, thahnem ngaihpui turin thawktute a fuih a ni. Ei leh in kawngah thinghlimna ngai pawimawh tur leh chaw tha chakna kengtam pek uar zel a tul hle a ni, a ti. Hriselna kawngah a hun taka vaccine lak tir tir leh 'health checkup' neihpui fo turin thawktute a chah a. Bawrhsap chuan Anganwadi Centre tina Mothers' Committee - te an tangkai hle tih tarlangin, thahnem ngai taka thawk zel turin a chah nghal bawk.
Bawrhsap hian Anganwadi Centre- 5, Electric - I, AOC-II, Lawngtlai Vengpui, Council Veng - II, leh College Veng - I, te a tlawh a, thilpek a hlan nghal theuh a ni. Anganwadi - Centre a thawktute chuan harsatna an neih ang ang an lo thlen a, Pu Donny Lalruatsanga chuan theihtawp chhuahpuia hmalak a tum thu a sawi a ni.