NICRA Zonal Monitoring Committee ten KVK Lawngtlai tlawhin, an hmalakna tha an tihthu sawiin, hma an sawn zel nan thurawn an pe.

Ram puma kuthnathawktute dawmkan nana hmalakna, Sik leh sa, leilung mila thlai chin leh ran vulh lama hnathawktute kawng kawhhmuha tanpui tura hmalakna, National Innovation on Climate Resilient Agriculture- Technology Demonstration Component hnuaia  KVK, Lawngtlai hmalakna hrang hrangte chu Zonal Monitoring Committee ten vawiin khan an tlawh.

Zonal Monitoring Committee te hi an Chairman Dr.C.A Srinivasa Murthy chuan hovin, Dr.C.Lalfakawma Senior Scientist and Head, KVK Lawngtlai hovin thawktute leh Kuthnathawktu ten lo dawngsawngin, KVK, Lawngtlai Hall ah KVK, Lawngtlai in NICRA hnuaia hma an lakna hrang hrang hrilh niin, Kuthnathawktu te an kawm bawk.

KVK Lawngtlai hmunpui, Chawnhu, Lawngtlai a NICRA hnuaia thlai chin leh ran vulh te a hmunah an en bawk.

Zonal Monitoring Committee hotute chuan KVK Lawngtlai hmalakna chu chhuanawm an tih thu sawiin, hma an sawn deuh deuh theih nan thurawn hrang hrang pein, an hmalakna tipuitlinga, chhawr tangkaitur kuthnathawktute pawh theihtawp chhuaha tan la sauh sauh turin an chah.

NICRA hi KVK, Lawngtlai chuan Kum 2023 atangin kalpui tanin tunah hian Chawnhu leh Ngengpuikai khua chu enkawl bikin, khaw pahniha kuthnathawktute chuan KVK mithiam te nen tanghovin, thlai chingin, ran an vulh mek.