FCAA 2023 dodalnan tukin zing dar 6 atanga MNF District Hqrs. Lawngtlai in Total Bandh a neih chuan Lawngtlai ah thlawp a hlawh ṭha viau a, chawhnu dar khan thlawp a hlawhṭhat vangin tihtawp a ni.
Zing dar 6 rik hma atangin khawpui chhung hmun pawimawh laiah te Duty an chhuakkhawm ṭan a, khawi hmun atang mahin harsatna thleng hriattur a awmlova, boruak muanawm tak hnuai ah Total Bandh hi neih a ni.
Lawngtlai khawpui chhunga Sorkar Office leh Zirna In te khar vek niin, Dawr leh Sumdawnna hmun dang te pawh khar niin, khawpui chhungah lirthei leh mipui veivak hmuhtur an awm mumallova, Bandh huaihawttuten phalna an pek te leh Bandh in a huamlohte tihloh chu veivak hmuhtur an awmlo.
MNF District Hqrs. Lawngtlai President Pu Lalzahawma Chinzah chuan Total Bandh tihtawp a nih hnu hian Lawngtlaia Thuthar thehdarhtute kawmin FCAA 2023 chu ram mipuite nekchepna a ni tih hriaa, Total Bandh an neih, mipuiin thataka an thlawp chu lawmawm a tihthu a sawi.