Kum 2015 atanga kumtina hman thing Green LADC Day chu vawiin khan ChiefExecutive Member, Pu N.Zangura hovin hman niin, National Highway-02 Lawngtlai leh Kawlchaw inkar ah thingtiak 300 chuang phun a ni.
Thingtiak phun hmaa inkhawmtawi, CEM Office tuala neih, Executive Secretary Pu K.Lalthanzara kaihhruaiah Chief Executive Member Pu N.Zangura chuan, hmasawnna hrang hrang vangin Thing leh mau, ramngaw a chereu nasaa, Leimin leh chhiatna hrang hrang a tamphah tih sawiin, ramngaw leh nungcha chereuzel vennan Thingphun belha, a puitling thlenga enkawlzui chu mitinin kan tihtheih a ni tih sawiin, State Sorkarin kumtin Thingphun beihpui thlaknan Green Mizoram Day a hmantho laiin, LADC huamchhungah hmalakna tichak turin Green LADC Day hmantel a ni thin chu a lawmawmin, kawngpuikam ah sulhnu chhuanawmtak tak hmuhtur a awmchho tawh a ni a ti a, mipui lam pawn Thingtiak phun a enkawlzui chu tihmakmawhah ngaiturin a sawm.
Green LADC Day ah hian LADC hnuaia Department hrang hrangte chuan chan insemin Thingtiakhi phunin, thatakin an hung nghal a, kum 2015 atangin kumin thlengin Thingtiak 3144 phun a ni tawha, nguntakin enkawlzui an ni tih Environment, Forest & Climate Change Department, LADC hotute chuan an sawi.
Vawiin Green LADC Day hmanna ah hian CEM hi MDC pahnih Pu JB Vanhoy leh Pu L.Daniala ten an tawiawm.
Tags
News