Chakma Autonomous District Council a BJP hruaitu, CEM Pu Molin Kumar Chakma chu vawiin khan No-Confidence Motion hmangin CEM atanga paihthlak a ni.
Chakma Autonomous District Council chuan vawiin khan CADC Session Hall, Chawngte ah, Chairman, Pu Lakhan Chakma kaihruaina hnuaiah Special Session an nei a, Chief Executive Member, Pu Molin Kumar Chakma chu No-Confidence Motion hmanga paihthlak a ni.
He motion hi Zoram People’s Movement (ZPM) member, Rengkashya Constituency aṭanga MDC thlan tlin, Pu Doymoy Daveng Chakma chuan a pulut a, CEM Pu Molin Kumar Chakma hian sorkarna chelh chhunzawm turin member a ngah tawk tawh lova, hruaitu thlak danglam ngai a nih thu a sawi.
Motion hi sawihona nghal niin, vote lak a ni a, Session atel Elected Member 17 zinga MDC 15 chuan motion hi an thlawp a, MDC 1 chuan motion thlawp lo zawngin a vote thung. MNF, MDC awmchhun, Pu Rasik Mohan Chakma chuan vote a thlak lo. BJP hruaitu, CEM paih duhtu an tam zawk vangin, CEM chu paihthlak a ni.
11th CADC hi hian CEM a tan Pu Rasik Mohan Chakma lakluh anih hnuah, kumin February ni 27 khan Pu Molin Kumar Chakma hian a thlak a, CADC ah hian thlantlin member 20 awmin, Member pakhat thita ai thlan anih loh avangin tun dinhmunah Member 19 an awm mek a, ZPM in member 16 neiin, MNF member 1 leh BJP Member 2 an awm mek a, BJP Member Pu Nirupam Chakma chu Session ah a tello.
Tags
News