.jpg)
Lawngtlai Auto Rickshaw Owners’ Association member, Henry Lalhmingmuana’n a passenger in a theihnghil cheng Nuai 17 vel a peklet chuan India ram a nghawr nghinga, Media House lian tak tak thlengin kha thilthleng kha an puangzar a nih kha.
Hei hun pawh a liamve leh hret tawh a, thilthleng hi thildangin a khuhchho zela, hriatreng a hlawhlo tial tiala, reivaklohvah hriatzui a hlawhlo mai thin a, hehi thil nihdan chiangsa pawh a nih rualin, Henry Lalhmingmuana hian chawimawina nasa zawk a phua, mirinawmte tan chawimawina awmthei ang ang hi dawn a phu in a hriat.
Tunlai khawvelah mirinawmlote vanga tawrhna a nasatziate, Pulpit tlang thlenga a nawlpuiin kan mizia chu chheta viau angte, rinawmna tundin a tulzia te aupui a nifova, Politician te phei chuan an inzawrhna Hmaithinghawng an hmanrimtak zingah Rinawmna hi a tel hial awm e.
Mizoram bik atanga chhut pawn, Lawngtlai chu thil thalo leh chanchin duhawmlo thlen tamna hmun, kawng hrang hrangah tukhum lam atanga nuihruk mai duhtawk lova, hmaichhana kawh a tawhmek lai a, Lawngtlai hi achhe veklo tih a lanfiahtirtu hian a phu ang chawimawina hi hlantur nise, a man a sang viauin a rinawm rualin, a phu ang nilovin, chawimawi duhna zawk thinlung hi a tithei apiangte atangin rawn langchhuak sela, a puala hunbik buatsaiha buaipui hial tham a niin a hriat. Henrya vanga Lawngtlai mawina aia duhawm, rinawmna vanga hmingthatna hi he khawpui hian a tawng leh angem tih pawh ngaihtuah tham a ni ang.