ZPM hruaitu Pu V.Zirsanga, Governor in CEM, LADC atan a pawmna vawiin khan tihchhuah a ni.

Lai Autonomous District Council a Chief Executive Member atan ZPM hruaitu Pu V.Zirsanga, Paithar bialtu MDC chu Governor in a pawmna chu vawiin khan tihchhuah a ni.

Pu V.Zirsanga CEM a pawmna tihchhuah a nihrual hian Ni 30 chhungin Pu V.Zirsanga hian thlawptu a neihdan fiah tur a tih a ni bawk.

Tarlantawh thin angin LADC a Congress leh MNF ten Sorkar intawm an siam chuan thlawptu a neingah tawkloh vangin Governor chuan Sorkar dinglai fiah nan February 12, 2025 khan Floor Test neiturin a ti a, hemi Ni hian  Lai Autonomous District Council a Chief Executive Member Pu C.Lalmuanthanga’n CEM atanga banna a thehluh vangin LADC Sorkar dinglai chu a tlu ta a ni.

Hemi hnu hian ZPM Legislature Party hruaitu Pu V.Zirsanga chuan LADC ah Sorkarna ZPM in an siamtheih thu Governor ah thlenin, Governor in CEM atan Pu V.Zirsanga a pawmna hi vawiin khan tihchhuah a ni ta a ni.

Mipui thlan Member 25 awmna LADC ah tun dinhmun ah ZPM in Member 13 neiin, MNF in Member 11, Congress in Member 1 an nei mek.