Nikum May ni 7 atanga Lai Autonomous District Council a Congress leh MNF Party Sorkar intawm chu vawiin khan Chief Executive Member Pu C.Lalmuanthanga’n banna Governor hnen ah LADC Chairman Pu V.L Hmuaka kaltlanga a thehluh vangin, tun dinhmun ah LADC Sokar dinglai chu a tlu.
Mipui thlan (Elected Member) 25 awmna LADC ah Congress leh MNF Party ten United Legislature Party dina thlariat leh tlem Sorkarna an chelh hnu ah ZPM Legislature Party leh an mahni thlawptu pahnih nenMember 13 nei chuan LADC a Sorkar dinglai chuan thlawptu a ngah tawhlo tih Governor a an thlen hnu ah, Governor ruahmanna angin vawiin chawhma dar 10:30 khan LADC Emergency Session kohvin Floor Test neihtura tih nimahse, Session ah Chairman Pu V.L Hmuaka chuan Chief Executive Member Pu C.Lalmuanthanga chu CEM atanga a ban thu House ah puangin, Sorkar dinglai a tluk thu a sawi a, Floor Test neih ngai a nih tak loh vangin Session a titawp.
Hetihlai hian United Legislature Party atanga ZPM thlawptu Elected Member pahnih Pu V.Zirsanga leh Pu Lallawmsanga Apetow te chuan MNF Party atanga banna nimin khan an thehlut.
ZPM Legislature Party hian an hruaitu atan Leader ah Pu V.Zirsanga, Dy Leader ah Pu Manghmuga Chinzah, Secretary Pu LR Dingliana Chinzah Treasurer ah Pu BN Thangpuia te an thlang
Kum 2020 a LADC Inthlanpui neih a nih khan, MNF Legislature Party chuan Pu Manghmunga Chinzah kaihhruaina hnuaiah Sorkarna an an siam a, Pu Manghmunga Chinzah hi December 14, 2020 ah CEM atan lakluh a ni.
August 27, 2021 ah MNF Legislature Party atang thovin Pu V.Zirsanga chuan Chief Executive Member thuthleng a luah ve leh a, Pu V.Zirsanga hi March 7, 2024 thleng CEM niin, Sorkar kal mumal theilovin engemawchen a awm hnu ah, Congress leh MNF ten Sorkar intawm siamin May 7, 2024 atangin Pu C.Lalmuanthanga chu CEM a ni ve leh a, vawiin khan Pu C.Lalmuanthanga hian banna a thehlut a, danpangngai ang chuan kumin kumtawp lam ah LADC ah hian Inthlanpui neihtur a ni.