Nimin Nilaini khan Krishi Vigyan Kendra (KVK) Lawngtlai chuan National Initiatives on Climate Resilient Agriculture (NICRA) project hnuaiah Chawnhu leh Ngengpuikai a Ar vulh tute hnenah ar tui tam thei chi leh thangchak Rainbow rooster leh Broiler chitha Vencobb 430Y no-te bakah ar chaw an sem.
He hun KVK Training Hall, Chawnhu a neih hi Dr. Lorrain Lalpekliana chinzah, Adviser to Chief Minister chuan hmanpuiin, he hun kaihruaitu Dr. C. Lalfakawma, Senior Scientist and Head chuan sik leh sa danglam chho zel mil a kuthnathawktute hmalakna her rem zel pawimawh zia a sawi a. Chumi tur chuan NICRA project chu kalpui a ni a ti. Dr. Lalthazuali, Subject Matter Specialist (Animal Science) chuan rainbow rooster leh broiler vulh chungchangah ar vulhtu khawmte zirtirna a pe.
Hemi huna khuallian Dr. Lorrain Lalpekliana Chinzah chuan sik leh sa inthlak danglam in nasa taka kan thlai chin te leh ranvulh te a nghawng dan a sawi a. NICRA project in kut hnathawktute harsarna sukiang thei tura technology tha tak a rawn chhawp chhuak chu lawmawm a tih thu sawiin, kut hnathawktu te chu mithiamte rawn chung zel a, taima taka hnathawk zel turin a sawm
National Initiatives on Climate Resilient Agriculture Project hi kum 2022 atang khan KVK Lawngtlai chuan kalpui tanin hmalakna chi hrang hrang an nei tawh a. Kum 2025 ah pawh he project hmang hian Chawnhu leh Ngengpuikai khuaah te hmalak mek ani.
Tags
News