Vawiin khan LADC a Chief Executive Member Pu C. Lalmuanthanga'n YLA South Lungpher Branch-te YLA Golden Jubilee lawmna hun a hmanpui.
Pu C.Lalmuanthanga chuan Golden Jubilee lawmnan YLA puanzar a pawtparh a, Khuallian, khualzahawm leh an kawppui-te leh South Lungpher VCP leh YLA President-te'n jubilee dar vawi 5 theuh an vua.
CEM Pu C. Lalmuanthanga chuan tun dinhmum a thlen theihna chhan chu Pathian vang a ni tih sawiin YLA hruaitute leh member-te chu Pathian hriatna leh tihna nena pawl kaihruai turin a chah.
"Khawvel-ah mi taima lo leh intodelh lo ram leh hnam reng reng mihuaisen a awm thei lova, huaisen tur leh mahni kea dingchhuak tur chuan kan taihmak a ngai a, kan thawhrim a ngai a, hna lo awm tur nghak mai lovin keimahniin hna thawh tur kan zawn a ngai a ni", a ti.
"Mimal, chhungkua, kohhran, NGO, sawrkar, ram leh hnam kutdawh kan nih lohna turin hei aia nasa zawkin hna kan thawh a ngai a, taihmakna leh tlawmngaihnate vawng nung zel ila, khawnuam leh ram nuam i siam ang u", tiin YLA member lo kalkhawmte leh South Lungpher mipuite chu a sawm a ni.
Golden Jubilee hmanna -ah hian Khual zahawm Pu F. Vanlalchhawna,South Lungpher VCP leh MTP Thiahra Branch President te'n thuchah an sawi bawk.
YLA President lo ni tawh mi 18 hnenah chawimawina thuziak hlan niin zirlai titha chawimawina hlan a ni a, YLA member tlawmngaiber chawimawina hlan a ni bawk.