Minister Pu K.Sapdanga'n Lawngtlaia hmunthenkhat a tlawh hnu ah 3rd IR Battalion hmunpui a tlawh.

Minister Pu K.Sapdanga chuan Lawngtlai a hmun thenkhat a tlawh hnu ah Third India Reserve Battallon hmunpui Thingkah a mi a tlawh.

UD & PA Minister  hian tukinzing khan Lawngtlai Electric Veng a leitlakhniam thinna lai a tlawh a, khawtlang hruaitute leh Official ten helai bawra harsatna thlenthin dan te Minister hi hrilhfiahin, Minister chuan a theih anga lo enzui a tum thu a sawi.

Pu K.Sapdanga hian Kaladan Multi Modal Transit Transport Project kawngpui pawh tlawhin, National Highway 54 laihna leivung vanga KMMTTP kawngin a tawrh nasatdan PWD hotuten an hrilh a,  Chanchinbumite zawhna chhangin Pu K.Sapdanga chuan  kawng pakhat laih vanga kawng dangin a chhiatphah chuan kawng sialtu hnuhnungzawk,NHIDCL ten dan zawm famkimloh an nei a nih a rinawm tih sawiin, KMMTTP kawngpui chunglam a National Highway zauhna thawktu NHIDCL hotute chu thilawmdan lo sawipui a tum thu a sawi.

Minister hian Lawngtlai Chandmary veng thlanmual bula Recreation Centre tura ruahman a tlawh bakah Lawngtlai SP Office a tlawh bawk a, hemi hnu hian Lawngtlai bul Thingkah a Third India Reserve Battalion hmunpui tlawhin tukthuan a ei.

Third Indian Reserve Battalion hmunpui ah hian Home Minister hi Pu F.Lalbiakzauva Commandant hovin an lo dawngsawng a, Home Minister in an Battalion hmunpui a tlawh chu lawmawm an tih thu sawiin, an mamawh hrang hrang te ngaihtuahsak turin an ngen.

Home Minister puala inkhawm buatsaih ah Pu K.Sapdanga chuan Mizoram a Police hmunpui dang zawng aiin Thingkah a 3rd IR Battalion hmunpui chu Police tan inzirna leh inchherchhuahna tan a tha tih sawiin, Battalion a awmte chuan Thingkah a an awm chu hnual phah nan a hmang lovin, midang tan awmve chakna tura an hmunpui chu siamturin a chah

Home Minister chuan 3rd IR Battalion ah mi 408 an awm tih sawiin Post ruak 510 lai a awm chu veitham a tling tih a sawi a, a awmsa zingah mi 104 lai mai hmundanga dah an ni chu a hriatthiamloh thu a sawi a, Sorkar chuan Police hnaruak 300 hnawhkhatturin ruahmanna thuitak a kalpui mek a ti.

Pu K.Sapdanga chuan tunhmain Police te chu hnuchhui kawngah te, venhimna kawngah te mipuiin an thlamuanpui thin tih sawiin, hetiang dinhmun hi kan luah leh ngei ka beisei a ti a, Sorkar chuan Police dinhmun a zirchiangmek tih sawiin Police nirengsi an hna thawk theilo an awm em ? tih te pawh nguntakin a enmek a ni a ti a, an inchinfel zawh chuan thawktu indaihlo deuh mahse, tun ai chuan Police an indaihzai theih an beisei tih a sawi bawk.

Home Minister chuan Third India Reserve Battalion ten taksa sawizawina lam an uar chu lawmawm a tih thu sawiin, Police te tan infiamna runpui neihtumin ruahmanna siammek a ni a ti.

Home Minister chuan Third India Reserve Battalion ten an mamawh hrang hrang an thlente chu a theih anga lo ngaihtuah a tum thu a sawi bawk.

Home Minister hi Lawngtlai East bialtu MLA, Adviser to CM Dr.Lorrain Lalpekliana Chinzah leh ZPM lai District hruaituten an tawiawm a, Home Minister puala inkhawm buatsaih ah hian  Pu C.Lalthanmawia Deputy Inspector General of Police ,Southern Range pawhin Police te fuihna thu a sawi bakah Home Minister in a tlawh vangin lawmthu a sawi a, Pu Jacob Hlychho Deputy Commandant 3rd IR Battalion chuan lawmthu sawiin hun a khar.