Central Young Lai Association hnuaia ruihhlo dotu, Member 18 awmna CYLA Drug Reduction Squad ten 2022, September atanga ruihhlo an man hlut zawng chu tualchhunga hralhna anga chhutin Rs. 1,14,93,000/- a tling tawh.
Central YLA Drug Reduction Squad Report a tarlan a nihdanin 2022 September 2 atanga tunthla Ni 4 thleng khan ruihhlo a inhnamhnawih mi 687 an mantawha, heng zinga 623 chu Mipa niin, a bak 64 chu Hmeichhia an ni.
Ruihhlo an mante hi Heroin hawng 193, Ganja Kg 23, Opium Kg 7, Sapzu um 715 bakah Tualchhung siam zu thahnemtak an man a, heng ruihhlo an mante hi tualchhunga hralhna anga chhut chuan Rs.1,14,93,000/- (Vaibelchhe khat, Maktaduai khat, Nuai li, Sing kua leh sang thum) a nih thu Report ah tarlan a ni.
Drug Reduction Squad Chairman Pu Eden Lalrammawia chuan ruihhlo an man leh a neitute hi Excise leh Police lam ah an hlan thin a, ruihhlo a inhnamhnawih mi 100 chuang chu an nun siamthat nan Home hrangah an dahlut bakah, an dahna Home ah te tanpuina an pek thin thu sawiin, ruihhlo do nan tanpuina petute chungah lawmthu a sawi.
Tags
News