Lawngtlai District Petroleum Dealer ten karleh Thawhtanni atanga Tuialhthei lakluh rihloh an tum chungchang ah nimin khan Additional DC Lawngtlai hovin helam kaihhnawih Sorkar hotute, Tlawmngai pawl leh Kohhran aiawhte leh Filling Station hotute an thukhawma, Petroleum Dealer te chu an thu suttura an ngenna chuan awmzia a la neilo.
Nimina Additional DC Pi B.Malsawmtluangi hova thutkhawmah hian Lawngtlai District Petroleum Dealers te chuan 'joint statement' an chhuah chhan sawifiahin 'Monthly Sales Target' nei an nih angin, Sales target -tlin turin tha taka inhralhchhuah a tul hle an ti a. Duhsak taka dawr thintuten harsatna an tawk fo thin a, a bik takin thingtlang lam atanga dawrtute tan barrel emaw gallon hmanga lak a ngai thin a, harsatna an tawk nasa hle a ni, an ti a. Mipui mamawh (essential commodities ) phurtu an nih angin, zalen zawka an sumdawnna kalpui chu an duh ber a nih thu an sawi.
Central Young Lai Association (CYLA) hotute chuan Myanmar lama tuialhthei hralh a awm thin vanga duty an nih thu sawiin, petrol pump neitute emaw mipuite tana harsatna siam tum hrim hrim an nih loh thu an sawi.
Meeting chuan Filling Station a Diesel leh Petrol, Barrel a laturte chuan DC ah phalna la hmasa se, hetianga phalna neite chu YLA Duty pawn lo chhuahse an ti a, Petroleum Dealer lam chuan AMPEDA ( All Mizoram Petroleum Delaers' Association) hnuaia awm an nih angin, AMPEDA lamah thlena, thutlukna an siam tur thu an sawi a, vawiin thleng chuan Lawngtlai District a Filling Station te chuan Tuialhthei lakluhloh an tumna chu an la sut lo.
Tags
News