Lai Autonomous District Council Emergency Session nithumna vawiin a LADC Session Hall, Lawngtlai ah neih ah Deputy Chairman atan Pu H.Lalmuansanga Tuithumhnar bialtu MDC thlan a ni a, Deputy Chairman thlan dawn hian ZPM Member ten House an chhuahsan.
LADC a Deputy Chairman Pu C.L.Lianzuala chuan Thawhtanni khan banna Chairman hnen ah a thehlut a, Pu C.L.Lianzuala hi tunhnaia Member dang pariat nen ZPM zawmtu zingah telin, tuna Congress leh MNF Sorkar intawmah Deputy Chairman nihzui chu thiltihawm ni a ngaih a nihloh vanga bang a ni a, nimin tlai dar 3 thleng khan Deputy Chairman chuhtum tana hming pekluhtheih niin, vawiin Session ah Chairman Pu V.L.Hmuaka chuan chuhtu dang awmlovin Deputy Chairman tan Pu H.Lalmuansanga thlan a nih thu a puang.
Deputy Chairman thlanna neih dawn hian eptu lam ZPM Member te chuan Deputy Chairman thlanna neihdan ah thil felhlel a awm ni a hriain, House an chhuahsan.
Opposition Leader Pu K.Hre Kung chuan vawiin chhun khan ZPM Office Bazar veng Lawngtlai ah thuthar thehdarhtute kawmin, Deputy Chairman thlanna neitur chuan hriattirna chhuah leh inthlanhun inkarah Ni hnih tal a tlatur a ni tih dan dinglai a awmlaiin, hmanhmawh leh chawpchilh takin, lehkha pawh eptu member ten an hmuhkim hmain Deputy Chairman thlanna neih a ni chu LADC Dan dinglai palzutna ni a an ngaih vanga House chhuahsan an nih thu a sawi a, eptu lam hruaitu a nih angin nimin lamah pawh Chairman hnen ah Deputy Chairman thlan hun chu dan bawhchhelo zawnga kalpui tura lo ngen tawh thu leh zawm erawh a hlawh talo tih Pu K.Hre Kung chuan a sawi bawk.
Tags
News