Tunthla Ni 27 a Lai Autonomous District Council hnuaia Village Council inthlanpui neihtur leh Lawngtlai Chandmary bial MDC by election neihturah chuhtumte tana hming pekluh hun chu vawiin chawhnu dar thum khan a tawp a, hming pekluhte hi naktuk chawhnu dar 3 atangin endik a ni ang.
LADC hnuaiah Village Council 99 awmin General Seat 496 leh Hmeichhe tana seat hauh 99 nen VC Member 595 thlanchhuah tur niin, chuhtumte hian Returning Officer hnen ah an hming an pelut a, hriattheih chin ah VC tamzawk chu kilthum atangin INC, MNF leh ZPM ten an chuh dawn a, Independent a chuh an awm nual in a rinawm bawk.
Assembly inthlan hnuhungber a Lawngtlai Chandmary bialtu MDC Dr Lorrain Lalpekliana Chinzah chu Lawngtlai East bial atangin MLA a thlantlin niin, Chandmary bial a chhuahsan vanga he biala MDC by election neih tur ah, Party pathum BJP, MNF leh ZPM candidate ten vawiin khan Returning Officer Lawngtlai DC, Pu Cheemala Siva Gopal Reddy hnen ah hming an pelut. He bial chuhtur hian BJP atangin Pu K.Lalawmpuia chuan hming a pelut a, MNF atangin Pu C.Lalsawmzuala chuan hming pelutin, Congress chuan Candidate hran siam lovin MNF nen an thawkho dawn a, ZPM atangin Chandmary MDC bial chuhtur hian Pu F.Hrangtukhuma'n hminga pelut bawk.
VC inthlanna a Vote tlate hi Inthlanni June 27 ah vote thlak zawhah chhiar nghal a ni dawn a, Ballot paper hman a ni ang. Lawngtlai Chandmary bial MDC by election ah hian EVM hman a ni dawn a, vote hi July 1 ah chhiar a ni thung ang.
Tags
News