Lai Autonomous District Council hnuaia Village Council 99 inthlanna leh Lawngtlai Chandmary MDC by election atan June 27 khian mipui ten vote an thlak dawn.
Inthlan hun tur leh tulpawimawh dangte hi vawiin khan State Election Commission, Mizoram a Commissioner Pu Laima Chozah chuan DC Conference Hall, Lawngtlai ah a puang a, inthlanna muanawm leh felfai a awmtheih nan inthlanna buaipuitu, Political Party te, Media, Tlawmngai pawl leh mipui tawiawmna a ngen a, mipui duhthlanna kaltlanga inrelbawlna thatak a awm theih nan theihtawp chhuah theuh tura sawmin, June 27, 2024 ah vote nei ten thlak vek turin a sawm bawk.
LADC hnuai ah hian Village Council 99 awmin General Seat 496 awmin Hmeichhe tana seat hauh 99 nen Village Council Member 595 thlanchhuahtur a ni a, Lawngtlai Chandmary bial MDC Dr.Lorrain Lalpekliana Chinzah chu MLA a thlantlin a nih hnu ah Chandmary bial hi a chhuahsan vanga By election neih ngai a ni.
Village Council leh MDC By election atan hian chuhtumte tan 18.6.2024 tlai dar 3 thleng hming a pekluh theih dawn a, hming pekluhte chu 19.6.2024 chawhnu dar 3 atangin endik a ni ang.
Inhnukdawkduh tan 21.6.2024 chawhnu dar 1 thleng hun hawn a ni a, June 27, 2024 zing dar 7 atanga tlai dar 5 inkar ah mipui ten vote an thlan ang.
Inthlanthat ngai a awm chuan 28.6.2024 ah inthlanthat a ni anga, Village Council inthlanna a vote tlate chu vote thlak zawhah chhiar nghal tur niin, Lawngtlai Chandmary MDC by election a vote tlate chu July 1, 2024 ah chhiar a ni thung ang.
Village Council inthlanna ah hian Ballot paper hman a ni dawn a, Lawngtlai Chandmary MDC by election ah vote thlak nan Electronic Voting Machine hman a ni thung ang.
State Election Commissioner Pu Laima Chozah chuan inthlanhun puan a ni tak vangin LADC huamchhungah Model Code of Conduct hman tan nghal a nih thu a sawi a, Commissioner hi Pu K.Laldingliana Secretary SEC, Mizoram leh Pu R.Vanrengpuia Dy Secretary SEC, Mizoram bak ah Lawngtlai District a Election lama thuneituten an tawiawm.
Tags
News